Maqedoni, zbulohen trafikantët e refugjatëve

Numri i emigrantëve që ilegalisht janë transportuar në territorin e Maqedonisë gjatë javëve të fundit, arrin në 181. Këta janë refugjatë, të ashtuquajtur ekonomikë

Kalimi i refugjatëve afro-aziatikë nëpër Maqedoni u ka hapur rrugë grupeve të trafikimit që të përfitojnë nga këta tragjedi. Ministria e Punëve të Brendshme (MPB) në këtë shtet, ka zbuluar gjithsej 25 raste të trafikimit të migrantëve vetëm nga nëntori i vitit të kaluar deri në janar.

Sipas një artikulli botuar nga Anadolu Agency, Natalija Spirova-Kordiç, kryeshefe e Sektorit për marrëdhënie me opinionin në MPB, thotë se numri i migrantëve që ilegalisht janë transportuar në territorin e Maqedonisë arrin në 181.

Kjo shifër është vetëm nga 19 nëntori i vitit 2015, kur Maqedonia filloi të zbatojë qasjes selektive të lejimit në territorin e Maqedonisë vetëm të refugjatëve që vijnë nga rajonet e përfshira nga lufta siç janë Siria, Afganistani dhe Iraku.

Në vijim Kordiç informon se që nga zbatimi i qasjes selektive të lëshimit të kalimit në kufirin jugor të Maqedonisë, janë kthyer gjithsej 12 mijë e 189 “migrantë të ashtuquajtur ekonomikë”, prej të cilëve 8 mijë e 146 janë kthyer në vet vendkalimin kufitar, ndërsa 4 mijë e 33 janë kthyer nga territori i Maqedonisë.

Përndryshe, para dy ditësh Armata e Republikës së Maqedonisë filloi me vendosjen e gardhit të dytë me tela me gjemba përgjatë kufirit maqedono-grek. Planifikohet që ky gardh i dyfishtë të jetë përgjatë kufirit jugor. Mbrojtja zbatohet për shkak të faktit se migrantët i shfrytëzojnë vendkalimet ilegale kufitare për të hyrë në Maqedonisë, prej ku vazhdojnë drejt BE-së.

Ndryshe, pas kalimit në Greqi, refugjatët që vijnë nga rajonet e luftës kalojnë në Maqedoni, nga aty në Serbi dhe më pas në Hungari apo Kroaci. Shumica e refugjatëve e kanë destinacion Gjermaninë e cila ka pranuar numrin më të madh të refugjatëve nga Siria, Iraku dhe Afganistani.