Maqedonia po i bllokon prodhuesit e Kosovës

Kohët e fundit bizneset prodhuese në Kosovë po hasin në barriera eksportuese nga Maqedonia.

Një pjesë e prodhimeve kosovare pengohen të hyjnë në Maqedoni dhe kjo argumentohet nga ana e maqedonasve me shtimin e procedurave dhe dokumenteve.

Shumë biznesmenë shprehen se e kanë të pamundur të sigurojnë dokumentet e kërkuara dhe e vlerësojnë këtë situatë tendencioze, raportojnë mediat kosovare

Kjo lidhet sipas tyre me raportin e publikuar pak ditë më parë nga ana e Komisionit Evropian ku thuhej se “toka e Kosovës është e helmuar”.

Bizneset prodhuese të Kosovës kanë shprehur akuza në adresë të Maqedonisë, për bllokimin e bizneseve të tyre.

“Kohëve të fundit është paraqitur një barrierë që ka të bëjë me eksportin e produkteve kosovare në Maqedoni, që askush në Kosovë nuk e di se çfarë dokumentesh kërkohen. Këto barriera janë të panevojshme dhe si duket kanë për qëllim vazhdimin e efekteve negative të atij raporti famëkeq, që thotë se toka e Kosovës është e helmuar”, ka thënë pronari kompanisë prodhuese “Abi-Elif”.

Pronari i saj ka kërkuar që të gjendet një zgjidhje që është e mundur që eksportet kosovare të depërtojnë në destinacionet e caktuara.

Sipas mediave kosovare me probleme të njejta janë të ballafaquar edhe kompanitë “Xharra Plas”, “Vëllezërit e Bashkuar”, të cilët shqetësimet i`a kanë shprehur kryetarit të Odës Ekonomike të Kosovës.