Maqedonia pranon qytetarët ilegalë nga Zvicra

Zvicra me Maqedoninë marrëveshjen për kthimin në Maqedoni të emigrantëve ilegal në Zvicër e nënshkruan të premten e javës së kaluar

Zyrtarë të Ministrinë së Brendshme të Maqedonisë, duke folur për marrëveshjen e nënshkruar me Zvicrën në fund të javës së kaluar, nuk kanë dhënë shifra për numrin e shtetasve të Maqedonisë që jetojnë në Zvicër, por kanë shprehur gatishmërinë t’i pranojnë mbrapa të gjithë individët dhe familjet që jetojnë ose punojnë ilegalisht në shtetin zviceran, raporton Koha në Shkup.

“Ne si Ministri e Brendshme jemi të gatshëm t’i pranojmë mbrapa të gjithë shtetasit e Maqedonisë që kanë emigruar në Zvicër ose që jetojnë dhe punojnë ilegalisht në këtë vend. Marrëveshje të ngjashme kemi nënshkruar me shumë shtete të tjera që janë ose nuk janë pjesë e Bashkimit Evropian, që në fakt flasin për bashkëpunimin e mirë me këto vende”, tha Ivo Kotevski, zëdhënësi i Ministrisë së Brendshme.

Zvicra me Maqedoninë marrëveshjen për kthimin në Maqedoni të emigrantëve që jetojnë ilegalisht në Zvicër e nënshkruan të premten e javës së kaluar.

Siç njoftoi Byroja Federale e Migracionit, kjo marrëveshje e zëvendësoi marrëveshjen e mëparshme, e nënshkruar në vitin 1998, nga ana e dy vendeve. Marrëveshja e re është nënshkruar nga ministrja maqedonase e Punëve të Brendshme, Gordana Jankullovska dhe nga ana e ambasadorit të Zvicrës në Maqedoni, Stefano Lazaroto.

Kjo marrëveshja rregullon pranim-dorëzimin reciprok të shtetasve të vet nga të dy shtetet. Në kuadër të saj mund të kthehen edhe persona nga shtete të treta ose persona pa shtetësi.

Përveç me Maqedoninë, Zvicra marrëveshje të ngjashme ka nënshkruar me 45 vende të tjera.

Në shtetin zviceran jetojnë me mijëra shtetas nga Maqedonia. Një numër i madh prej tyre, bashkë me familjet, jetojnë në këtë vend me dekada, megjithatë procedurat e ndërlikuara vazhdojnë t’i mbajnë këta shtetas në kategorinë e emigrantëve, ndërsa me marrëveshjen e re rrezikojnë të kthehen në Maqedoni.