Maqedonia subvencionon fluturimet me kosto të ulët

Tenderi duhet të përmbajë së paku një qytet në Spanjë pastaj Italinë, Skandinavinë, rajonin e Beneluksit dhe Evropën Qendrore

Qeveria e Maqedonisë ka shpallur një thirrje të hapur (tender) për të gjitha linjat ajrore me kosto të ulët që janë të gatshme për të nisur fluturime nga Shkupi në gjashtë destinacione të reja në Evropë.

Shërbimet gjatë tre viteve të ardhshme do të subvencionohen nga qeveria. Tenderi që përfshin gjashtë rrugë të reja duhet të përmbajë së paku një qytet në Spanjë pastaj Italinë, Skandinavinë, rajonin e Beneluksit dhe Evropën Qendrore.

Linjat e reja pritet të nisin deri në fund të vitit. “Futja e fluturimeve të reja është e rëndësishme si për turizmin dhe biznesin, por edhe për shtetasit e Maqedonisë që jetojnë jashtë vendit. Atyre u duhet të ndërrojnë disa herë aeroplanët dhe kështu përballen me shpenzime të mëdha”, ka thënë dje Nikola Gruevski, kryeministri i Maqedonisë.

Njoftohet se një ndër favoritët për të aplikuar për këto subvencione është kompania Wizz. Ajo aktualisht organizon fluturime nga Treviso dhe Londra për në Shkup. Pretendentë të mundshëm janë edhe linjat ajrore me kosto të ulët nga Turqia.