Marshohet për drejtësi

FB: Memli Krasniqi

Të dielën në Prishtinë do të mbahet marshi qytetar dhe solidarizues në mbështetje të luftës së Ushtrisë Çlirimtare të Kosovës dhe ish-krerëve të saj, Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarët e tyre në Hagë, përcjell albinfo.ch.

Marshi nis nga sheshi “Zahir Pajaziti” dhe vazhdon drejt sheshit “Skënderbeu” me fillim nga ora 14:00. Pjesë e marshit do të jenë partitë politike, shoqëria civile e shumë qytetarë.

Ideatorët e platformës “Liria ka emër, Eliza Hoxha dhe Ismail Tasholli, kanë thënë se ish-krerët e UÇK-së nuk janë duke u përballur me procesin gjyqësor për shkak të emrave të tyre të përveçëm, por për shkak se me emrat e tyre lidhet epoka më e ndritur e historisë sonë të re. “Përkundër se populli shqiptar ka qenë viktimë e një lufte të imponuar, me vite të tëra, proceset gjyqësore të pabaza i kanë përndjekur ndër vite ish-pjesëtarët e Ushtrisë Çlirimtare të Kosovës, kulmi i të cilave manifestohet me procesin e Dhomave të Specializuara, në të cilat aktualisht po mbahen ish krerët e UÇK-së, Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarë të tjerë”, ka thënë Eliza Hoxha për kosovapress, përcjell albinfo.ch.

Ajo me rastin e fillimit të procesit gjyqësor kundër ish-krerëve të UҪK-së, në emër të solidaritetit me heronjtë tanë ka ftuar të gjithë qytetarët në marsh solidarizimi për drejtësi.