Masakër në SHBA: Së paku 27 të vrarë në një shkollë

Fillimisht, raportimet kontradiktore folën për dy atentatorë, por policia përgënjeshtroi lajmin. Një person i dytë u arrestua por ai nuk konsiderohet zyrtarisht si i dyshuar

Të paktën 27 persona kanë mbetur të vdekur, 22 prej te cilëve fëmijë të moshave 6-10 vjeç, pasi të paktën një person i armatosur ka hapur zjarr me breshëri në një shkollë fillorë në shtetin Konektikat, në SHBA.

Sipas medieve amerikane, është konfirmuar edhe vdekja e disa mësuesve e drejtoreshës së shkollës, në “Sandy Hook Elementary School”, në Njutaun.

“Associated Press” lajmëroi se vrasësi, një 24-vjeçar me emrin Ryan Lanza, mbeti i vrarë në vendngjarje, por nuk është ende e qarte nëse ai kreu vetëvrasje apo u vra nga forcat policore.

Fillimisht, raportimet kontradiktore folën për dy atentatorë, por policia përgënjeshtroi lajmin. Një zëdhënës tha se ndërsa një person i dytë u arrestua në shkollë dhe po merret ne pyetje, ai nuk konsiderohet zyrtarisht si i dyshuar.

Shkollat në të gjithë rajonin u mbyllën me urdhër të autoriteteve, nga frika e një sulmi të koordinuar ndaj shkollave fillore.

Përveç të vdekurve, janë regjistruar edhe një numër i paqartë personash të plagosur, tre prej të cilëve raportohet në gjendje kritike nga “CNN”.

Sipas një dëshmitari të ndodhur pranë shkollës, të shtënat u dukën se erdhën nga korridori, ndërsa të paktën 100 plumba u shkrepën.

Burime të tjera thonë se të shtënat ndodhën brenda një klase.

Kjo masaker eshte e krahasueshme me me te renden te ndodhur ndonjehere, ne nje universitet ne Virxhinia, ku 32 studente u ekzekutuan nga nje tjeter student, i cili ne fund te masakrës vrau veten ne vitin 2007.