Masat e para për ndalimin e fenomenit të kërkimit të azilit

Në pikat e kalimit kufitar ka nisur të shpërndahen fletëpalosje për ndërgjegjësimin e qytetarëve që të mos abuzojnë me të drejtën e lëvizjes së lirë

Qeveria e Shqipërisë ka nisur të marrë masa për parandalimin e fluksit të azilkërkuesve, pas kërcënimeve që mori nga disa shtete se mund të rikthehet regjimi i vizave.

Në pikat e kalimit kufitar ka nisur të shpërndahen fletëpalosje për ndërgjegjësimin e qytetarëve që të mos abuzojnë me të drejtën e lëvizjes së lirë.

“Sot, nëpërmjet shpërndarjes së këtyre fletëpalosjeve që do t’u vihen në dispozicion të gjithë udhëtarëve shqiptarë, kërkojmë që t’i ndërgjegjësojmë ata që të plotësojnë me përpikëri kriteret e lëvizjes së lirë në të gjitha vendet e Bashkimit Evropian, në mënyrë që Shqipëria të mos ndihet e rrezikuar nga fenomeni i azilkërkimit, i cili është ngritur si një shqetësim nga disa prej vendeve të BE-së”, ka thënë zv. ministrja e Brendshme, Rovena Voda, raporton TCH.

Ajo u bëri thirrje qytetarëve që të mos shkelin rregullat e lëvizjes së lirë, pasi shanset për të përfituar azil janë zero. Vetëm gjatë muajit gusht janë kthyer 177 shtetas shqiptarë, të cilët nuk kanë plotësuar kriteret e lëvizjes së lirë në vendet e zonës Schengen.