Mbërrin në 12 numri i të vrarëve në protestat në Iran

Sipas asaj që raporton Televizioni shtetëror, "demonstrues të armatosur kanë sulmuar postet policore dhe ato ushtarake. Si përgjigje, ata janë qëlluar dhe vrarë".

Keystone

Janë përshkallëzuar protestat antiqeveritare në Iran që po vazhdojnë nga e enjtja e javës së kaluar. Sipas televizionit shtetëror të Teheranit, të cituar nga mediet perëndimore deri tash kanë humbur jetën 12 persona. Vetëm të dielën kanë vdekur 10 sish.

Sipas asaj që raporton Televizioni shtetëror, “demonstrues të armatosur kanë sulmuar postet policore dhe ato ushtarake. Si përgjigje, ata janë qëlluar dhe vrarë”.

Ndërkohë, presidneti i Iranit, Hassan Ruhani i ka cilësuar parimisht protestat si e drejtë legjitime, por ka tërhequr vërejtjen nga përshkallëzimi i tyre, me ç`rast rrezikojnë sigurinë dhe stabilitetin e vendit.

Njerëzit kanë dalë në rrugë kundër papunësisë dhe rritjes së çmimeve të artikujve ushqimorë. Qeveria i ka gjykuar si ilegale protestat në fjalë dhe ka reaguar me dhunë kundër tyre.

Protestat të cilat po mbahen në së paku 9 qytete, përfshirë këtu dhe kryeqytetin, Teheranin, po shikohen në botë si nismë e një revolucioni të ri në këtë vend, pas atij islamik, të zhvilluar në vitin 1979. Studentët janë më së shumti të përfshirë në këto protesta.