Shqipëri – Mbi 2.2 milionë shtetas shqiptarë jetojnë jashtë vendit, ndërsa pjesa dërrmuese e tyre janë në moshë pune. Këto të dhëna pasqyrojnë përmasat e diasporës shqiptare dhe ndikimin e vazhdueshëm të emigrimit në zhvillimet demografike të Shqipërisë, transmeton albinfo.ch.
Sipas të dhënave të Institutit të Statistikave të Shqipërisë (INSTAT), të përfshira në Profilin Kombëtar të Migracionit 2025, diaspora shqiptare e krijuar pas viteve 1990 numëron gjithsej 2,256,346 persona. Kjo shifër përfaqëson rreth 49 për qind të numrit të përgjithshëm të shtetasve shqiptarë.
Rreth 1.74 milionë persona, apo afërsisht 77 për qind e diasporës, i përkasin grupmoshës 15–64 vjeç, duke përfaqësuar një potencial të rëndësishëm njerëzor dhe ekonomik.
Ndërkohë, 18 për qind e shqiptarëve që jetojnë jashtë vendit janë fëmijë të moshës 0–14 vjeç, ndërsa vetëm 5 për qind janë persona mbi 65 vjeç. Këto të dhëna tregojnë se emigrimi nuk përfshin vetëm individë që largohen për punësim, por edhe familje që vendosen jashtë Shqipërisë.
Sa i përket përbërjes gjinore, meshkujt përbëjnë 52.2 për qind të diasporës, ndërsa femrat 47.8 për qind.
Italia dhe Greqia vazhdojnë të jenë destinacionet kryesore të emigrantëve shqiptarë. Megjithatë, vitet e fundit është rritur edhe prania e tyre në Gjermani dhe në vende të tjera të Evropës Veriore dhe Qendrore.
Sipas të dhënave të Eurostat-it, të cituara nga mediumi ekonomik shqiptar Ekofin, gjatë vitit 2024 vendet e Bashkimit Evropian kanë lëshuar rreth 79 mijë leje të para qëndrimi për shtetasit shqiptarë. Kjo paraqet një rritje prej 5.5 për qind krahasuar me vitin paraprak.
Prej këtyre lejeve, 47.6 për qind janë dhënë për bashkim familjar, ndërsa 29.1 për qind për arsye punësimi.
Të dhënat dëshmojnë për përmasat e mëdha të diasporës shqiptare dhe rolin e saj në aspektin ekonomik e shoqëror, ndërsa emigrimi po merr gjithnjë e më shumë karakter të vendosjes afatgjatë të familjeve jashtë Shqipërisë./Albinfo.ch
