Mbi 200 spitale publike dhe private të kujdesit akut në Zvicër

(KEYSTONE/Laurent Gillieron)

Ka më shumë se 200 spitale publike dhe private të kujdesit akut në Zvicër, me densitetin më të lartë në botë. Kjo do të thotë se popullsia ka një zgjedhje të gjerë për sa i përket kujdesit mjekësor, përcjell albinfo.ch.

Por cilat janë prioritetet e tyre kur zgjedhin një strukturë të kujdesit shëndetësor?

Sipas një sondazhi të kryer nga kompania e sigurimit Groupe Mutuel, kriteri më i rëndësishëm i përzgjedhjes lidhet me ekspertizën mjekësore për ndërhyrjen/trajtimin në fjalë. Kjo është renditur si prioritet nga 68 për qind e të anketuarve.

Kriteri i dytë është marrëdhënia dhe ndërveprimi ndërmjet mjekut dhe pacientit. Më pas vjen cilësia e kujdesit dhe vëmendja e personelit të kujdesit shëndetësor.

Fleksibiliteti në orët e vizitave si dhe kënaqësia e përgjithshme e pacientit u konsideruan gjithashtu të rëndësishme kur zgjidhni një spital.