Mbi 70 mijë japonezë jetojnë më shumë se një shekull

Numri i japonezëve që jetojnë më shumë se 100 vjeç, po rritet çdo vit

Një raport nga qeveria japoneze tregoi se për herë të parë në Japoni, numri i personave që kanë  arritur moshën 100 vjeç ka arritur në 70 000.

Në raportin e Ministrisë japoneze të Shëndetësisë, Punës dhe Mirëqenies thuhet se kjo shifër u rrit me 2% nga një vit më parë, duke arritur rekordin e 71 238 personave, ku 88% e tyre ishin gra.

Japonia ka parë një rritje të shpejtë të numrit të personave 100-vjeçarë, që nga koha kur qeveria numëroi për herë të parë 153 të tillë në vitin 1963, transmeton ATSH.

Sipas raportit, në vitin 1998 ky numër kapi shifrën 10 000 persona dhe në vitin 2012 shifrën 50 000, përcjell albinfo.ch.

Personi më i moshuar në botë i certifikuar nga “Guinness” është 116-vjeçarja japoneze, Kane Tanaka, e lindur më 2 janar të vitit 1903.

---