Dy aeroportet, ai i Shkupit dhe i Ohrit, kanë shënuar rritjen më të lartë të numrit të udhëtarëve në periudhën nga janari deri në korrik të këtij viti, në krahasim me të njëjtën periudhë të vitit të kaluar. Bëhet fjalë për 22%.
Aeroportet në BE kanë shënuar rritjen e numrit të udhëtarëve në gjysmën e parë të vitit me 6.2%, thonë në organin që përfaqëson interesat e më shumë se 500 aeroporteve në 45 vende evropiane, përcjell albinfo.ch.
“Dinamika e rritjes ndryshon mes vendeve të BE-së, në mënyrë që tregjet kryesore, si Franca, Gjermania dhe Italia, janë nën mesataren e BE-së, ndërsa Bullgaria, Qipro, Danimarka, Hungaria, Irlanda, Lituania, Luksemburgu, Malta, Portugalia, Rumania dhe Spanja kanë arritur rritje të dyfishtë.
Megjithatë, ritmi i rritjes në mes të tremujorit të parë dhe të dytë ka rënë nga + 8.2% në + 4.8%. Kjo vlen për pothuajse të gjitha tregjet e BE-së, veçanërisht në Belgjikë për shkak të sulmeve terroriste.
Pjesa më e madhe e rritjes është e përqendruar në aeroportet e mëdha dhe të mesme, si Berlin-Schönefeld (+ 39.4%), Këln-Bon (+ 19.8%), Bukuresht (+ 16.5%), Dublin (+ 13.4%), Barcelona (+ 12.7%), Birmingham (12,6), Budapest (+ 11.9%) dhe Kopenhagë (+ 10.9%).
Në mesin e top 5 aeroporteve më të ngarkuara të BE-së, rritjen e trafikut e ka shënuar aeroporti në Londër “Heathrow”, ai në Paris, “Charles de Gaulle” dhe ai në Frankfurt, ndërsa i Amsterdamit “Schiphol” (+ 9.9%) dhe Madrid (8,6) kanë regjistruar rritje të lartë.
Kjo sugjeron se linjat ajrore me kosto të ulët janë nxitësit kryesorë të transportit ajror.
