Mbretëria e Bashkuar vendos leje online për hyrjen e vizitorëve evropianë

Tomek Baginski @tombag

Nga sot, vizitorët evropianë në Mbretërinë e Bashkuar do të kenë nevojë për një leje hyrjeje të zbatuar online, në kuadër të rregulloreve të reja të udhëtimit të paraqitura nga qeveria britanike, përcjell albinfo.ch.

Sistemi i Autorizimit Elektronik të Udhëtimit (ETA), i cili hyn në fuqi nga sot, synon të rrisë sigurinë kufitare dhe të thjeshtojë proceset e hyrjes.

Shefi i Forcave Kufitare të Mbretërisë së Bashkuar, Phil Douglas, e përshkroi sistemin si një “masë të sigurisë kufitare” dhe theksoi se nuk pritet asnjë ndërprerje e madhe pas fillimit të zbatimit të tij.

ETA zbatohet për shtetasit nga rreth 30 vende evropiane, përfshirë të gjitha vendet anëtare të Bashkimit Evropian (BE), përveç Irlandës.

Si funksionon sistemi ETA

Sistemi ETA është i lidhur në mënyrë digjitale me pasaportën e aplikantit dhe lejon qëndrime deri në gjashtë muaj.

Procesi i aplikimit, i disponueshëm përmes aplikacionit për telefona të mençur ose faqes zyrtare të qeverisë britanike, zgjat rreth 10 minuta dhe kërkon një fotografi pasaporte dhe imazhin e fytyrës. Vendimet zakonisht merren brenda pak minutash.

Leja është e detyrueshme për të gjithë udhëtarët, përfshirë foshnjat dhe fëmijët, por ata që kalojnë tranzit nëpër Mbretërinë e Bashkuar janë të përjashtuar. Ky përjashtim u bë pas shqetësimeve të ngritura nga aeroporti “Heathrow” për mundësinë e humbjes së pasagjerëve.

ETA nuk kërkohet për banorët e Mbretërisë së Bashkuar ose individët me një status ekzistues imigrimi në vend.

Mbretëria e Bashkuar e prezantoi sistemin ETA vitin e kaluar për shtetasit amerikanë, kanadezë dhe të tjerë të përjashtuar nga viza, ndërsa zbatimi i sotëm është pjesë e një plani më të gjerë për shtrirjen e sistemit tek vizitorët nga e gjithë bota.