Me iniciativën e një mërgimtari, spitali i Bochumit ndihmon QKUK-në

Spitali Augusta-Kranken-Anstalt GMBH nga Bochum i Gjermanisë ka dhuruar një donacion në vlerë 33 mijë e 300 euro për QKUK-në

Bashkatdhetarët që punojnë dhe jetojnë më mërgatë, përveç dërgesave për familjet e tyre,  ata nuk e harrojnë as ndihmën ndaj atdheut. Nazmi Bytyçi, i cili punon inxhinier në Spitalin Augusta-Kranken-Anstalt GMBH nga Bochum i Gjermanisë, nxiti qytetarët gjermanë që ta ndihmojnë Kosovën me pajisje spitali.

Me iniciativën e Bytyçit dhe humanitetin që tregoi ky spital gjerman, gjatë kësaj jave në Prishtinë, në Klinikën e Torakales në Qendrën Klinike Universitare, erdhi një ndihmë e konsiderueshme me pajisje me vlerë 33.300 euro.

Donacioni përmban 65 shtretër, 38 dyshekë, 50 kabina shtrati, 2 karroca transporti dhe një shtrat mjekimi. Një pjesë e donacionit do të shkojë edhe për Spitalin e Përgjithshëm të Prizrenit.

Donacioni është rezultat i bashkëpunimit ndërmjet drejtorit të Klinikës së Kirurgjisë Torakale, dr. Saudin Maliqi me Spitalin Augusta-Kranken-Anstalt GMBH dhe inxhinierin Bytyçi.

Zyra e drejtorit të përgjithshëm të Shërbimit Spitalor Klinik Universitar të Kosovës (SHSKUK) falënderon donatorët, në veçanti angazhimin e z. Bytyçi për këtë donacion, i cili është i mirëseardhura për QKUK dhe spitalet e përgjithshme. SHSKUK përmes zyrës së pasurisë do të bëjë regjistrimin e këtij donacioni dhe më pastaj ai menjëherë do të mund të shfrytëzohet për institucionet shëndetësore që është dhuruar.