Më shumë se 100 mijë vetura pa sigurime

Këto makina janë bërë burim potencial i aksidenteve në trafik, por edhe të informalitetit në ekonominë shqiptare

Më shumë se 100 mijë automjete nuk janë siguruar nëpër kompanitë e sigurimeve në Shqipëri, ndërsa qarkullojnë pandalshëm nëpër rrugët e këtij shteti. Këto makina janë bërë burim potencial i aksidenteve në trafik, por edhe të informalitetit në ekonominë shqiptare.

Të dhënat zyrtare flasin se, numri i makinave të regjistruara është katërfish më shumë, por vetëm 300 mijë prej tyre kanë sigurime, raporton “Vizion plus”.

Autoriteti i mbikëqyrjes financiare ka publikuar hartën gjeografike të sigurimeve, ku peshën kryesore e mbajnë qytetet me numrin më të madh të automjeteve. 

Të tilla automjete, që në një pjesë të mirë përdoren nga policët, shpesh herë janë kthyer edhe në burim aksidentesh dhe ky fakt ka bërë që gjyqet për çështje të tilla, të kthehen në maratonë.

Duke iu referuar Kodit Rrugor, penaliteti për mungesë sigurimi nis nga 80 deri në 300 euro gjobë, deri në bllokim automjeti.

Në Shqipëri, ndërkaq vazhdon të jetë një treg i variueshëm sa i përket sigurimeve të automjeteve. Varësisht nga ana e kompanive shkon edhe taksa e sigurimit. Për këtë çështja ka ndërhyrë Autoriteti i Mbikëqyrjes Financiare, i cili ka kërkuar nga drejtorët e kompanive të sigurimit për të rregulluar këtë çështje.

Kryetarja e AMF, Enkeleda Shehi kërkoi nga kompanitë që të shohin me kujdes përcaktimin e primeve, ndërkohë që ka bërë me dije se AMF do të ndërhyjë në çdo rast në mënyrë që të ruhen parametrat teknikë të shoqërive.