Më shumë të hyra në Shqipëri nga doganat sesa në Kosovë

Diferenca në vlerën e të ardhurave doganore në Shqipëri është relativisht e vogël, krahasuar me Kosovën, vetëm 100 milionë euro

Shqipëria ka përmbyllur llogaritjet e të hyrave për vitin e kaluar. 930 milionë euro shënojnë të ardhurat nga doganat për vitin 2011 duke tejkaluar planin e të ardhurave doganore në masën 1.5 për qind, ose 13.8 milionë euro më shumë se plani.

 Drejtoria e Përgjithshme e Doganave ka prezantuar performancën e Administratës Doganore në vitin 2011 dhe sfidat për vitin 2012, ku një ndër sfidat është edhe përfundimi i rehabilitimit infrastrukturor në doganat e Morinit në Kukës dhe të Hanit të Hotit në Shkodër, raportojnë mediat shqiptare.

Sipas këtyre medieve, diferenca në vlerën e të ardhurave doganore në Shqipëri është relativisht e vogël, krahasuar me Kosovën, vetëm 100 milionë euro.

 Sipas specialistëve, kështu ndodhë meqë prodhimi vendas në Shqipëri është më i zhvilluar se në Kosovë dhe këtë e tregon edhe bilanci i eksport-importeve Shqipëri-Kosovë, ku Shqipëria ka eksportuar mallra prodhime vendi në Kosovë me vlerë 90 milionë euro, ndërsa Kosova ka eksportuar në Shqipëri mallra vendore me vlerë prej 28 milionë euro.