Më shumë turistë, sfidë cilësia e shërbimeve

Numri i qytetarëve që kanë hyrë në Shqipëri përgjatë këtij sezoni është rritur për 27 për qind.

Krahas turistëve që vijnë nga rajoni, harta turistike është zgjeruar edhe me turistë suedezë, sllovakë, çekë, polakë, austriakë dhe gjermanë.

Ministrja e Turizmit në Shqipëri, Eglantina Gjermeni, tha për mediat në Tiranë se një nga problemet është cilësia e shërbimi që ofrohet për turistët, për t’i bërë ata të rikthehen sërish në Shqipëri.

„Është investuar në godina, jo në burime njerëzore, pjesë e strategjisë si trajnimi periodik me stafet e sipërmarrjeve private”, deklaroi Gjermeni.

Me gjithë kërcënimet, në plazhet kryesore të Shqipërisë vazhdon të mos respektohet vendimi për plazhet publike, në shumicën e plazheve nuk ka ende roje plazhi dhe as kordone sigurie në ujë.

Siç kanë raportuar mediat në Tiranë, dy ditë më parë një adoleshent u mbyt në Divjakë, pasi u përfshi nga dallgët, ndërsa në plazh nuk kishte asnjë roje.