Meloni: Qeveria italiane nuk do të pranojë të shantazhohet nga Putin

Keystone (AP Photo/Andrew Medichini)

Qeveria e re italiane nuk do të pranojë të shantazhohet nga presidenti rus, Vladimir Putin, tha kryeministrja Giorgia Meloni, duke shtuar se vendi po përballet me disa nga sfidat më të vështira që nga Lufta e Dytë Botërore.

Në fjalimin e saj të parë në Parlament, Meloni tha se koalicioni i saj nacionalist, i krahut të djathtë, do ta bënte zërin e saj të dëgjohet në Evropë dhe se ajo nuk kishte nevojë për ndonjë mbikëqyrje nga qeveritë e huaja, raporton Reuters, përcjell albinfo.ch.

Meloni theksoi se do të vazhdojë politikën e ish-kryeministrit Mario Draghi në mbështetjen e Ukrainës në konfliktin e saj me Rusinë.

“Dorëzimi ndaj shantazhit të Putinit ndaj prodhuesve të energjisë nuk do ta zgjidhte problemin, por do ta përkeqësonte atë, duke u hapur rrugën kërkesave dhe shantazheve të mëtejshme”, tha kryeministrja italiane.

Ajo tha se qeveria do të ofrojë mbështetje financiare për familjet dhe bizneset e prekura nga kriza energjetike, duke paralajmëruar se kostoja e lartë për ta bërë këtë do të thotë se administrata e saj mund të duhet të anulojë disa nga premtimet e saj të fushatës.