Mësimi plotësues në diasporë, prioritet për ministrin Murati

Rol të rëndësishëm në implementimin dhe avancimin e mësimit plotësues pothuajse tash 30 vjet kanë pasur asociacionet arsimore, si Lidhja e Arsimtarëve dhe e Prindërve Shqiptar

Mbështetja dhe promovimi i mëtejshëm i mësimit plotësues është me rëndësi të veçantë për Ministrinë e Diasporës.

Këto premtime i ka bërë ministri i Diasporës, Valon Murati, në një takim me Nexhat Malokun, kryetar i LAPSH-së (Lidhja e Arsimtarëve dhe e Prindërve Shqiptarë) në Zvicër.

Një njoftim të MeD-it thuhet se.Maloku e ka njoftuar  ministrin Murati për punën e Lidhjes, e cila tashmë po hyn në dekadën e tretë të veprimtarisë së saj. Po ashtu, Maloku foli edhe për mbështetjen e shtetit të Zvicrës lidhur me procesin e mësimit plotësues, sakrificat dhe pengesat që po shkaktohen në këtë proces.

Ministri Murati  e falënderoi Malokun për vizitën dhe për tërë punën që LAPSH-i ka bërë gjatë kësaj kohe.

Ai e njoftoi për vullnetin dhe seriozitetin e tij dhe të Ministrisë në përkushtimin për ta avancuar çështjen e arsimit plotësues në diasporë.

Procedimi me urgjencë i projektprogramit të përbashkët për zhvillimin e mësimit plotësues në diasporë dhe mërgatë është një ndër prioritetet e punës së Ministrisë që në fillim.

Ministri Murati theksoi se po bëhet punë intensive edhe në koordinimin e dikastereve të tjera qeveritare që kanë të bëjnë me këtë projekt.

Ai premtoi bashkëpunim të ngushtë për tejkalimin e të gjitha sfidave dhe problemeve që ka diaspora jonë, kur bëhet fjalë për mësimin plotësues.