Migrimi ilegal nuk duhet të ndikojë në procesin e vizave

KE-ja e ka ndërlidhur procesin e liberalizimit të vizave për Kosovën me numrin e madh të azilkërkuesve në BE. Kjo nuk është e drejtë

Foto Ilustrim

Procesi i liberalizimit të vizave dhe migrimi ilegal nuk duhet të kushtëzohen  në mes vete. Një gjë e tillë nuk është aplikuar as për vendet tjera, u tha në një punëtori për media lidhur me Migracionin dhe Liberalizimin e vizave. Besa Shahini, në cilësinë e analistes së lartë në Institutin për Studime Evropiane (ESI) tha se nuk është e drejtë që Komisioni Evropian e ka ndërlidhur migrimin ilegal me liberalizimin e vizave për qytetarët e Kosovës.

“Që të qartësohet procesi i liberalizimit të vizave është që të bëhet një vlerësim strikt por i drejtë të procesit teknik të përmbushjes për Kosovën. KE-ja e ka ndërlidhur procesin e liberalizimit të vizave për Kosovën me numrin e madh të azilkërkuesve në BE. Kjo nuk është e drejtë”, ka thënë Shahini.

Ajo ka thënë se janë dy role të pazëvendësueshme që i luajnë mjetet e informimit.

“Kemi pasur shumë keqinformim në këto muajt e fundit edhe për numrin e azilkërkuesve edhe për vendet nëse japin ose nuk japin azil, kjo duhet të ndryshohet dhe mediet duhet të jenë më të përgjegjshme për mënyrën e raportimit, shkruan kosovapress.com . Po ashtu duhet të ndryshohet mënyra se si po flitet edhe për liberalizmin e vizave por edhe për migrimin legal ose ilegal. Mediet janë në frontin e parë ku plasohet informacioni dhe plasimi i gabuar i informacionit do ta  ndryshonte debatin definitivisht”, ka thënë ajo.

Profesoresha e Universitetit të Prishtinës, “Hasan Prishtina”, dega e Gazetarisë, Remzije Shahini-Hoxhaj tha se punëtoria e sotme nxori përfundime se Kosova nuk i ka pasur të njëjta kriteret për liberalizmin e vizave sikurse të shteteve tjera.

Më tutje ajo tha se mediet duhet të kenë rolin informues dhe edukues sa i përket migrimit, por që sipas saj, në valën e madhe të migrimit, mediet e kanë luajtur një rol negativ në këtë aspekt për shkak se shpesh herë kanë dezinformuar qytetarët, sikurse ishte shembulli që Gjermania po i ofron mundësi punësimi, apo që Franca po ofron leje qëndrimi për kosovarët.