Migrimi po e zbraz Shishtavecin

Vetëm nga komuna e Shishtavecit në rajonin e Kukësit, gjatë muajve të fundit janë larguar 250 persona, të rinj dhe familjarë që ia kanë mësyrë Gjermanisë

Një jetë më mirë në vendet e Bashkimit Evropian po kërkojnë edhe qytetarët e veriut të Shqipërisë. Janë qindra banorë të komunës Shishtavec në rrethit të Kukës, që janë larguar nga shtëpitë e tyre, me qëllim emigrimin drejt vendeve BE-së. Sipas mediave atje, shqiptarët po ikin drejt Gjermanisë.

Vetëm nga Shishtaveci, që është e përbërë nga banorë të Gorës, janë larguar gjatë kësaj periudhe më shumë se 250 persona, të rinj dhe familjarë. Ndërsa sipas banorëve të tjerë të fshatit, pritet që shembullin e tyre ta ndjekin edhe shumë të tjerë. Largimi i tyre ka ardhur për shkaqe ekonomike.

Kryetari i kësaj komune, Dilaman Nela thotë se iu ka bërë thirrje banorëve që të mos largohen, mirëpo askush nuk e ka dëgjuar, pasi ata shpresojnë se në Gjermani do të gjejnë një jetë më të mirë, raporton TCH.

Shqetësimi më i madh i Nelas, është rikthimi i këtyre banorëve, nga vendet që kanë shkuar, duke qenë se nuk lejohet qëndrimi i tyre atje, “pasi këtu ata kanë shitur pronat e tyre dhe kjo do shoqërohet me plagë sociale”.

Në këtë zonën, siç raportojnë banorët, fenomeni i largimit ka qenë dukshëm i shfaqur, ku shumë të rinj kanë emigruar drejt Anglisë, mirëpo tani, 250 persona kanë ikur drejt Gjermanisë.

Komuna Shishtavec ka të regjistruar, rreth 5 mijë banorë, por një pjesë e madhe e tyre jetojnë edhe në qytete të tjera të vendit dhe kthehen në vendlindje vetëm gjatë stinës së verës.