Mijëra francezë, në protestë kundër shtrëngimit të masave

Raportohet se mijëra protestuesë mbushën sheshet në qytete të ndryshme franceze pas paralajmërimit të presidentit francez, Emanuel Macron, se do të përpiqej të vështirësonte jetën e personave të pavaksinuar, përcjell albinfo.ch.

Thuhet se demonstruesit vikendin që shkoi akuzuan qeverinë për shkelje të lirive të tyre dhe trajtim të pabarabartë për qytetarët për sa i përket projektligjit që synon të kufizojë lirinë e qytetarëve për të hyrë në bare, restorante dhe muze, nëse nuk kanë marrë plotësisht dozat e vaksinave, duke hequr edhe mundësinë e paraqitjes të një testi negativ.

Protestuesit bënë thirrje për liri, ku mbanin pankarta në duar me shkrime si “Jo lejes së vaksinimit” në një formë reference shtytëse ndaj kufizimeve që Macron kërkon të vendosë.  Autoritetet franceze thanë se rreth 105 mijë qytetarë morën pjesë në këto protesta, 18 mijë vetëm në kryeqytetin francez, Paris.

Zyrtarë të Ministrisë se Brendshme thanë se 34 persona janë arrestuar dhe rreth 10 oficerë policie janë plagosur, pasi protestat u bënë të dhunshme në disa vende.

Qeveria është shprehur se pret që masat e reja të hyjnë në fuqi më 15 janar, megjithatë Senati i mbizotëruar nga opozita mund të vonojë procesin.