Mijëra persona në Athinë protestojnë kundër vaksinimit anti-covid

Është bërë e ditur se më shumë se 5 000 protestues kundër vaksinave, disa prej tyre që mbanin në dorë kryqe druri dhe flamuj grekë, u mblodhën në Athinë të Mërkurën për të kundërshtuar programin e vaksinimit të Greqisë, përcjell albinfo.ch.

Me pankarta “merrni vaksinat tuaja dhe ikni nga këtu!” si dhe duke kërkuar dorëheqjen e Kryeministrit Kyriakos Mitsotakis, protestuesit u mblodhën jashtë parlamentit nën praninë e fortë të policisë.

“Çdo person ka të drejtë të zgjedhë. Ne po zgjedhim që qeveria të mos zgjedhë për ne,” tha Faidon Vovolis, një kardiolog.

Gjithsesi. një sondazh i fundit nga Pulse për Skai TV zbuloi se shumica e Grekëve thanë se do të bënin vaksinën dhe shumica ishin pro vaksinimit të detyrueshëm për disa segmente të popullsisë.

Rreth 41% e grekëve janë vaksinuar plotësisht. Të hënën, qeveria urdhëroi vaksinimin e detyrueshëm të punonjësve të kujdesit shëndetësor dhe stafit të shtëpive të moshuarve.

Në shtetin me mbi 11 milion banorë, më shumë se 444,700 njerëz janë infektuar që nga fillimi i pandemisë dhe 12,782 kanë vdekur.

Autoritetet regjistruan gati 3,000 infeksione të reja të Mërkurën.