Mijëra qytetarë presin kryeministrin Rama në Preshevë

Shqiptarët me flamuj kombëtarë, por edhe me valle e këngë, po e presin Ramën si kryeministër të të gjithë shqiptarëve. Ardhja e Ramës nuk kaloi edhe pa incidente

Mijëra qytetar të Luginës së Preshevës janë tubuar në sheshin “Liria” në Preshevë, për ta pritur kryeministrin e Shqipërisë, Edi Rama i cili pritet pas pak të mbërrij në këtë qytet. Shqiptarët me flamuj kombëtarë, por edhe me valle e këngë, po e presin Ramën si kryeministër të gjithë shqiptarëve.

Burimet e Albinfo.Ch, nga Lugina e Preshevës raportojnë, se qyteti i Bujanocit dhe ai i Preshevës janë mbushur me forcat të xhandarmërisë serbe për të garantuar vizitën e  kryeministri shqiptar, i cili po ashtu pritet të shpallet qytetarë nderi i Komunës së Preshevës.

Kjo vizitë konsiderohet historike për shqiptarët atje, pasi që është lideri i parë i qeverisë shqiptare që viziton këtë rajon me shumicë absolute shqiptare, prej që Shqipëria është pavarësuar më 28 nëntor 1912. Rama ka qenë edhe një herë në Luginë, por si liderë i opozitës për të promovuar librin “Kurban”.

Megjithatë j vizita e Ramës, nuk kaloi edhe pa incidente, për faktin se disa qytetarë u arrestuan nga forcat serbe, derisa po vendosnin flamuj kombëtarë. Ndërsa në autostradën në afërsi të Vranjës, policia serbe ka bllokuar autobusin me gazetarë e operatorë që ishin të akredituar për të ndjekur vizitën në Preshevë.

Policia serbe ka dhënë disa argumente për këtë ndalesë. Sipas saj, duhet më parë të kalojë delegacioni zyrtar e më pas mund të kalojnë mediat e akredituara për ndjekjen e vizitës. Më vonë merret vesh se ata janë liruar pas gati një orë pritje.

Ndryshe, një ditë më parë, kryeministri Rama qëndroi në Beograd, ku u takua me homologun e tij serb, Aleksandar Vuçiq, me të cilin mbajtën një konferencë për media që nga nikoqiri u vlerësua si provokuese.

Rama në këtë konferencë foli edhe për Kosovën, duke thënë se pavarësia e saj e njohur nga më shumë se gjysma e shteteve të Kombeve të Bashkuara është një realitet i pakthyeshëm, dhe se sa më shpejtë që të pranohet ky realitet nga të gjithë, aq më mirë do të jetë për të gjithë rajonin.

Po ashtu a kërkoi që të respektohen të drejtat e shqiptarëve në Luginë sikurse ato të serbëve në Kosovë.

Kryeministri Rama do të mbaj një fjalim në pallatin e Kulturës, me pas do të ecë këmbë deri të materniteti i Preshevës, që është edhe pjesë e investimeve shqiptare, ndërsa do të vizitoj edhe shkollën se mesme “Sezai Surroi” në komunën e Bujanoci. Po ashtu ai në hotel “Rozafa” në Bujanoc do të ndalet për drekë, ndërsa nëpër pikëkalimin e Konçulit kalon në Kosovë.