Ministri Makolli për vizitë në Australi

Ai u takua me ministrin federal të Emigracionit dhe të Mbrojtjes së Kufijve, Scott Morrison, me të cilin bisedoi për bashkëpunimin rreth emigracionit

Ministri i Diasporës, z. Ibrahim Makolli, po qëndron për vizitë zyrtare në Australi. Ministri Makolli ka zhvilluar takime me autoritetet qeveritare dhe me bashkatdhetarët tanë, bëhet e ditur në një komunikatë për medie, të dërguar nga Ministria e Diasporës.

Me këtë rast, ai u takua me ministrin  federal të Emigracionit dhe të Mbrojtjes së Kufijve,  Scott Morrison, me të cilin bisedoi për një bashkëpunim më të mirë mes Qeverisë së Kosovës dhe asaj të Australisë,  sa u përket politikave dhe çështjeve të emigracionit. Ministri Makolli e njoftoi z.Morrision për punën dhe objektivat që ka Ministria e Diasporës dhe përkushtimin që ka si ministri në promovimin e të drejtave të shqiptarëve në botë, si dhe kultivimin e gjuhës dhe të traditës kombëtare, thhet më tej në komunikatë.

Vend të rëndësishëm në këtë vizitë të ministrit Makolli zënë takimet e shumta me bashkatdhetarët dhe me shoqatat shqiptare në Melburn dhe Sidnei.

Në takimin e mbajtur në Melburn, i organizuar nga komuniteti shqiptar në këtë qytet, morën pjesë qindra mërgimtarë, të cilët e falënderuan ministrin  për vizitën dhe kontributin që po jep Qeveria e Kosovës për bashkatdhetarët në diasporë.

Ministri Makolli e ka vizituar edhe Ambasadën e Republikës së Kosovës në kryeqytetin e Australisë, në Kanberra.

I ngarkuari me punë në Ambasadën e Kosovës, Skënder Durmishi, e ka njoftuar ministrin Makolli për  angazhimet e deritashme të Ambasadës në Kanberra, me theks të posaçëm për gjendjen, sukseset dhe preokupimet kryesore të  mërgatës sonë në Australi.

Ministri  Makolli  është shprehur  i bindur se hapja  e Ambasadës në këtë shtet ishte hap i duhur. Ajo do të  jetë  mekanizëm efikas i mbështetjes për bashkatdhetarët  tanë dhe për realizimin e rolit të saj  themelor, për përfaqësimin dhe mbrojtjen e interesave të shtetit të Kosovës, thellimin e bashkëpunimit me shtetin mik të Australisë,  por edhe me vendet e tjera të kësaj pjese të Paqësorit Jugor. Në këtë aspekt, ministri Makolli  theksoi se bashkëpunimi me Ministrinë e Diasporës  do të jetë me rëndësi të veçantë, për të dëshmuar se edhe në këtë distancë bashkatdhetarët tanë do ta kenë dhe do ta ndiejnë  dorën e kujdesit të Qeverisë së Kosovës.

Nesër, ministri Makolli  do të takohet me përfaqësuesit e shoqatave kryesore të mërgatës sonë  në Sidnei, thuhet në fnd të komunikatës.