Ministri Murati i gëzohet fitores së boksierit Bajrami

“Falënderoj Tefikun që fillimisht ka zgjedhur Kosovën prej të gjitha vendeve në botë ku ka mundur ta realizojë meçin, e më pas edhe për fitoren e titullit kampion në WBU”, tha Murati

Sukseset e shqiptarëve në diasporë janë evidente në shumë fusha, si kulturë, politikë, art e shkencë, ndërsa Tefik Bajramit është shembull i mirë që diaspora shqiptare është duke shkëlqyer edhe në fushën e sportit. Kështu deklaroi ministri i Diasporës, Valon Murati gjatë një takimi që zhvilloi me kampionin e boksit, Bajrami.

“Falënderoj Tefikun që fillimisht ka zgjedhur Kosovën prej të gjitha vendeve në botë ku ka mundur ta realizojë meçin, e më pas edhe për emocionet e dhëna gjatë 5 raundeve, kur edhe e fitoi titullin e kampionit në versionin WBU”, deklaroi ministri.

Në anën tjetër, Bajrami shprehu falënderimet ndaj Ministrisë së Diasporës për pritjen dhe mbështetjen e ofruar, duke u zotuar se edhe në të ardhmen do të kontribuojë për afirmimin sa më të madh të sportit, por edhe ndihmë për të njëjtin në Kosovë.

Tefik Bajrami e fitoi titullin e më të mirit në boks në një meç interesant që zhvilloi në Podujevë, ku si kundërshtar e kishte boksierin hungarez, Attila Makula.