Ministri turk: Njerëzve që shesin drogë para shkollave duhet thyer këmbët

Nëse një shitës droge është afër një shkolle, policia e ka detyrë t’ia thyejë këmbët. Bëjeni atë dhe më fajësoni mua. Edhe nëse kushton pesë, dhjetë, 20 vjet burgim – do ta paguajmë”

Ministri i Brendshëm i Turqisë, Suleyman Soylu ka marrë kritika të shumta pasi i kishte thënë policisë së shtetit që t’ua thyejë këmbët njerëzve që shesin drogë para shkollave.

Asociacioni për të Drejtat e Njeriut në Turqi dhe disa gazeta kanë kritikuar Soylun për nxitje të kryerjes së krimeve. Ai ka thënë se përgjegjësinë do ta marrë vetë.

“Nëse një shitës droge është afër një shkolle, policia e ka detyrë t’ia thyejë këmbët. Bëjeni atë dhe më fajësoni mua. Edhe nëse kushton pesë, dhjetë, 20 vjet burgim – do ta paguajmë”, ka thënë ai në një takim publik për sigurinë.

Ai ka thënë se forcat e sigurisë kanë konfiskuar 20 ton heroinë më 2017 dhe kanë pasur rekord arrestime për drogë.

Soylu ka shtuar se Turqia duhet t’i luftojë shitësit e drogës siç bën me Partinë Punëtore të Kurdistanëve (PKK).

“Atë që e bëjmë ndaj terroristëve të PKK-së duhet ta bëjmë edhe me shitësit e drogës – askush s’mund ta helmojë të ardhmen tonë. Çfarë bën një polic është përgjegjësi e imja”, ka shtuar ai, transmeton Albinfo.ch.

Sipas një raporti të vitit të shkuar nga Qendra Monitoruese Evropiane për drogë dhe varësi nga droga, Turqia është vend transit për kontrabandë të heroinës drejt Evropës nga Afganistani.