Ministria e Kulturës shuan “Kosovafilmin”

Ministria e Kulturës ka vendosur që ta shuajë “Kosovafilmin”. Punën që kishte nisur para gati pesë vjetësh Astrit Haraqija, sa ka udhëhequr me kulturën e vendit, garnitura e re politike në MKRS është afër ta bëjë.

Me ndryshimet e Ligjit për kinematografi, e për të cilin në Ministrinë e Kulturës thonë se janë afër që ta dërgojnë në Kuvendin e Kosovës, parashihet që institucioni që dikur prodhonte filma tash të futet nën ombrellën e Qendrës Kinematografike të Kosovës. E ky institucion ka për detyrë që të bëjë shpërndarjen e mjeteve që shteti ndan për prodhimin e filmave.

Drejtori i “Kosovafilmit”, Gani Mehmetaj, këtë veprim e ka quajtur kriminal. Prejse është themeluar Qendra Kinematografike e Kosovës, në vitin 2008, atij më shumë i është dashur që të shkruante shkresa kundër vendimeve të Ministrisë së Kulturës për mospërfillje të institucionit që drejton. Ai thotë se komuniteti artistik në vend do të reagojë sërish, si në kohën e ish-ministrit Haraqija, teksa ka bindjen se nuk do të lejohet që “Kosovafilmi” të shuhet.

Por në Ministrinë e Kulturës thonë se puna tashmë është e kryer. Shasivar Haxhijaj, këshilltar i lartë i ministrit të Kulturës, Memli Krasniqi, ka thënë të martën se kjo çështje do të rregullohet në kuadër të ndryshimeve në Ligjin për kinematografi.

“Me Ligjin për kinematografi, të cilin jemi duke e amendamentuar, do të parashihet që ‘Kosovafilmi’ më të mos jetë institucion i veçantë, por të futet nën ombrellën e Qendrës Kinematografike të Kosovës”, ka thënë Shasivar Haxhijaj./ Koha Ditore/