Ministrja e Arsimit përkrah kryeministrin Rama për Akademinë e Shkencave

"Zgjedhjet e djeshme në Akademi ishin pika e fundit që derdhi kupën e mbushur në vite, sepse dëshmuan mungesën më shembullore të çdo sensi reflektimi mbi kalbëzimin tanimë pa kthim të atij institucioni"

Ministrja e Arsimit, Lindita Nikolla, i ka dalë në krah kreut te ekzekutivit Shqiptar Edi Rama lidhur me  çështjen e Akademisë së Shkencave. Në një postim në facebook ajo ka thënë se e mbështet  deklaratën e djeshme të kryeministrit për Akademinë e Shkencave dhe e vlerëson atë si një reagim momental, transmeton albinfo.ch.

“Të njëjtën bindje me kryeministrin ndajnë edhe persona të tjerë, publikisht të rreshtuar më shumë se sa një herë kundër qeverisë.  Zgjedhjet e djeshme në Akademi ishin pika e fundit që derdhi kupën e mbushur në vite, sepse dëshmuan mungesën më shembullore të çdo sensi reflektimi mbi kalbëzimin tanimë pa kthim të atij institucioni.

Prandaj, edhe financimi publik i Akademisë së Shkencave në këto kushte do të ishte thjesht bashkëfajësia në heshtje përballë një fakti kokëfortë: Akademia e Shkencave ka humbur çdo arsye dhe funksion të ekzistencës së saj”, ka shruar ministrja Nikolla.