Miqësorja e tretë luhet në Zvicër

Miqësorja në Gjenevë do të luhet me 25 maj, ndërsa në Prishtinë nuk kanë dashur të tregojnë se cili është kundërshtari. Thuhet se është më i fortë se Haiti

Qytetarët kosovarë që jetojnë në Zvicër mund të ndihen më të privilegjuar, pasi që Kombëtarja e Kosovës ka zgjedhur Gjenevën për të luajtur lojën e tretë miqësore në futboll. Ndeshja në Gjenevë do të luhet më 25 maj, ndërsa në Prishtinë nuk dashur të tregojnë se cili është kundërshtari.

Ajo që dihet, është se fakti se ndeshja do të luhet katër ditë pas miqësores së dytë, që reprezentacioni i Kosovës do ta zhvillojë kundër Turqisë në stadiumin “Adem Jashari” në Mitrovicë.

Burime të gazetës “Arena Sport” pranë Federatës së Futbollit të Kosovës kanë njoftuar se menjëherë pas sfidës ndaj Turqisë, Kosova do të udhëtojë për në Zvicër, ku më 25 maj në Gjenevë do ta luajë ndeshjen e tretë zyrtare miqësore.

Gjithsesi, FFK nuk e zbuluar emrin e kundërshtarit, por gazeta mëson se është më i fortë se Përfaqësuesja e Haitit dhe se nuk është pjesëmarrës në Kampionatin Botëror që këtë vit zhvillohet në Brazil.