Miratohet shqyrtimi i Projektligjit për shtetësinë e Kosovës, përfitojnë shqiptarët e Luginës

EPA/VALDRIN XHEMAJ

Në mbledhjen e fundit të qeverisë, është miratuar shqyrtimi i projektligjit për shtetësinë e Kosovës.

Qeveria e Kosovës ka miratuar shqyrtimin e projektligjit për shtetësinë e Kosovës. Ky projektligj është një kornizë ligjore që synon të rrisë efikasitetin, transparencën, sigurinë dhe drejtësinë e proceseve të shtetësisë.

Kryeministri i Kosovës, Albin Kurti, ka thënë se lehtësohet fitimi i shtetësisë të personave me lejeqëndrim të përhershëm në rrethana të jashtëzakonshme, duke përfshirë edhe shqiptarët e Preshevës, Medvegjës dhe Bujanocit që jetojnë që shumë vite në Kosovë.

Ndërsa ministri i Punëve të Brendshme, Xhelal Sveçla, thotë se ky projektligj synon të rrisë efikasitetin, transparencën dhe sigurinë e proceseve për shtetësinë.

“Në kohën e rritjes së lëvizshmërisë, ky ligj afirmon të drejtën për shtetësi të shumëfishtë dhe si prioritet adreson nevojën e kahershme për lehtësimin e kritereve për përfitimin e shtetësisë edhe për qytetarët e Luginës”, është shprehur Sveçla, përcjell albinfo.ch.