Mobilizohen kosovarët për pastrimin e mjedisit

24 maji është dita kur do të mobilizohen të gjithë kosovarët, organizatat e ndryshme, në mbështetje të iniciativës“Ta pastrojmë Kosovën"

Agjencia për Mbrojtjen e Mjedisit të Kosovës, ka nënshkruar një Memorandum Bashkëpunimi me organizatat jo-qeveritare, i cili synon realizimin e nismës “Ta Pastrojmë Kosovën” për pastrimin e territorit të Kosovës nga mbeturinat e llojeve të ndryshme të shkaktuara nga faktori njeri.

Memorandumi është nënshkruar nga kryeshefi ekzekutiv i AMMK-së, Ilir Morina dhe përfaqësuesi i OJQ-ve te bashkuara për këtë nismë, Luan Hasanaj.

Morina ka bërë të ditur se kjo nismë ka rëndësi jo vetëm për Kosovën por me porosi dhe efekt të mirë edhe për krejt rajonin e Ballkanit Perëndimor.

Ai ka thënë se nisma e shoqërisë civile “Ta pastrojmë Kosovën” pritet që të aktivizojë mbi 50.000 vullnetarë.

Ky memorandum ka për qëllim të koordinimit të aktiviteteve, bashkëpunimit dhe mbështetjes në mes të Agjencisë për Mbrojtjen e Mjedisit të Kosovës dhe Organizatës Joqeveritare “Ta pastrojmë Kosovën”.

Memorandumi synon që të promovojë dhe avancojë çështjen e mbrojtjes së mjedisit dhe thellimin e bashkëpunimit në mes të AMMK-së me OJQ-në “Ta Pastrojmë Kosovën”.