Mos ia mësyni Gjermanisë, s’ka azil për shqiptarët

Ministri shqiptar i Punëve të Brendshme, Saimir Tahiri e garantoi homologun gjerman Thomas De Maiziere, se qeveria në Tiranë është angazhuar maksimalisht për ndalimin e azilkërkuesve shqiptarë. Ai, kërkoi në Berlin nga autoritetet gjermane, shkurtimin e procedurave të përpunimit të kërkesave për azilkërkuesit shqiptarë.

Ministri Tahiri po ashtu e njofto homologun gjerman, se policia shqiptare është inslauzar nëpër pikat kufitare si dhe po i heton grupet e kontrabandistëve që mashtrojnë shqiptarë duke u premtuar azil.

“E informova kolegun për masat që ka marrë Shqipëria dhe gjithashtu i bërë të qartë angazhimin e qeverisë shqiptare për të mos lejuar në asnjë mënyrë shtetas shqiptarë që në mënyrë të padrejtë vijnë e kërkojnë azil politik. E bëmë të qartë që nuk ka azil politik në Gjermani dhe në asnjë vend të BE-së”, deklaroi Tahiri.

Edhe homologu gjerman tha se tema boshte e takimit në Berlin, ka qenë bashkëpunimi  në luftën kundër krimit të organizuar dhe korrupsionit.
”Po merremi bashkërisht me një çështje që na shqetëson, siç është azili. Janë shqiptarë nga Shqipëria apo nga shqiptarë që jetojnë në vende të tjera që vijnë në Gjermani për të kërkuar azil. Ky është një shqetësim i madh sepse mund të prodhojnë pasoja në raport me vendimin tuaj, që ju do donit t’i evitonit”, deklaroi De Maiziere, raporton TCH.

Ai po ashtu dha një mesazh të qartë se: “nuk ka asnjë shans për të fituar azil politik në Gjermani”.

Të gjithë shqiptarët që kanë ardhur, apo që do të vijnë do të rikthehen në vendin e tyre. Në Shqipëri ka një demokraci krenare dhe nuk ka arsye për përndjekje politike. Ne do të bëjmë shumë për ta zhdukur këtë shqetësim dhe do të kemi bashkëpunonim të madh jo vetëm duke u fokusuar te arsyet e gabuara të kërkesave për azil”, tha De Maizier.