MPB: Sivjet migruan 14 mijë kosovarë

Sivjet në vendet e BE-së kanë dalë ilegalisht rreth 14 mijë kosovarë, që është një shifër pak më e ulët se në vitin e kaluar. Në vitin 2013 ikën mbi 20 mijë veta

Ministra kosovare e Punëve të Brendshme ka dalë të mërkurën mbrëma me një shifër shqetësuese të imigrimit ilegal të qytetarëve. Drejtor i Departamentit për Shtetësi, Azil dhe Migracion në MPB, Valon Krasniqi, ka thënë se deri më tani nga Kosova kanë ikur 14 mijë qytetarë të Kosovës.

Sipas tij, shumica e tyre janë nga Ferizaj, Shtime, Lipjan e Gjakovë.

“14 mijë qytetarë të Kosovës janë nisur drejt vendeve të BE’së. 21 mijë qytetarë janë larguar vitin e kaluar”, ka thënë Krasniqi, për Klan Kosova. Sipas tij, shumica e qytetarëve që po migrojnë janë faktorët ekonomik dhe social.

Brenda pesë vjetëve të fundit më shumë se 70 mijë qytetarë të Kosovës kanë kërkuar azil në vendet e Bashkimit Evropian. Ndërsa, vala më e madhe e ikjeve ishte në vitin 2013 me 20 mijë kosovarë të migruar ilegalisht. Këto shifra kanë dalë nga Raporti i fundit i Zyrës Mbështetëse Evropiane për Azil.

Sipas statistikave, në vendet e BE-së në vitin 2009 kanë kërkuar azil: 14275, në vitin 2010 – 14310, në 2011 janë 9880, në vitin 2012 – 10210 dhe në vitin 2013 kanë kërkuar azil 20225.