MPJ prezantoi Strategjinë për Diplomacinë Digjitale

Zëvendësministri Selimi tha se qëllimi i strategjisë është përdorimi i diplomacisë digjitale për të zgjidhur problemet e politikës së jashtme kosovare. Ministria kosovare e Punëve të Jashtme me ndihmën e Ambasadës së Norvegjisë dhe Amba.sadës së Britanisë së madhe kanë prezantuar në Prishtinë, Strategjinë për Diplomaci Digjitale. Kjo strategji, ka për qëllim internacionalizimin e Kosovës […]

Zëvendësministri Selimi tha se qëllimi i strategjisë është përdorimi i diplomacisë digjitale për të zgjidhur problemet e politikës së jashtme kosovare.

Ministria kosovare e Punëve të Jashtme me ndihmën e Ambasadës së Norvegjisë dhe Amba.sadës së Britanisë së madhe kanë prezantuar në Prishtinë, Strategjinë për Diplomaci Digjitale. Kjo strategji, ka për qëllim internacionalizimin e Kosovës në botë nëpërmjet infrastrukturës globale të internetit, apo njohjes nga uebfaqet.

Zëvendësministri i Punëve të Jashtme i Kosovës, Petrit Selimi, së bashku me Ambasadorin e Norvegjisë në Kosovë, Jan Braathu, Sekretaren e Parë të Ambasadës së Mbretërisë së Bashkuar, Myrna MacGregor, Drejtoreshën e British Council, Arjeta Emra, kanë shpalosur pjesë të strategjisë, synimet e saj dhe rezultatet e pritura.

“Kjo strategji është produkt i një partneriteti të gjerë ndërmjet Ministrisë së Punëve të Jashtme të Kosovës, Ambasadës Norvegjeze, Ambasadës Britanike, Këshillit Britanik dhe Fondacionit IPKO, të cilët do të bëjnë të mundur implementimin e saj. Tash së fundi edhe USAID ka vendosur ta përkrah financiarisht implementimin e Strategjisë për Diplomaci Digjitale”, tha Selimi.

Në këtë projekt, ai tha se është punuar për gati gjashtë muaj, nga ekspert vendorë e ndërkombëtarë, me qëllim që ta përdorim diplomacinë digjitale, mjetet e reja të informimit në internet për qëllimet e diplomacisë publike dhe njohjes sa më të madhe të Kosovës në botën e jashtme.

Selimi ka prezantuar pjesët kryesore të Strategjisë, qëllimet dhe objektivat e saj, duke theksuar se ideja e strategjisë është se si ta përdorim diplomacinë digjitale për të zgjidhur problemet e politikës së jashtme.

Ndërsa, Ambasadori i Norvegjisë në Kosovë, Jan Braathu, tha se është kënaqësi e madhe për të dhe Ambasadën Norvegjeze që të jetë partner në këtë projekt.

Braathu tha se Qeveri Norvegjeze gjithnjë ka qenë mbështetëse e fuqishme e Kosovës, përfshirë edhe diplomacinë kosovare dhe përpjekjet e saj për të projektuar imazhin e “Evropianëve të Rinj” në shtetet tjera dhe për të fituar në mënyrë të vazhdueshme sa më shumë njohje për shtetësinë e Kosovës.

Ai vlerësoi rëndësinë e madhe që ka interneti në informimin e njerëzve në botë, duke theksuar se ky mjet komunikimi na ofron mundësi që mesazhet tona t’ia dërgojmë një audience globale. Ambasadori Braathu premtoi 50 mijë euro për implementimin e Strategjisë për këtë vit, dhe “më shumë mjete vitin e ardhshëm”.

Sekretarja e Parë e Ambasadës së Mbretërisë së Bashkuar, Myrna MacGregor, ka theksuar rëndësinë e diplomacisë digjitale në zhvillimet diplomatike aktuale, duke theksuar mbështetjen e Ambasadës së Mbretërisë së Bashkuar për projektin në fjalë.