MSA, thyen izolimin ekonomik

Shumë afaristë dhe përfaqësuesit e institucioneve janë duke e parë Marrëveshjen e Stabilizim-Asociimit si alternativë për të dalë nga izolimi disa vjeçar

Ekonomia kosovare vazhdon të mbetet më e izoluara në Evropë për shkak të kufizimeve tregtare. Mirëpo shumë afaristë dhe përfaqësuesit e institucioneve kosovare janë duke e parë Marrëveshjen e Stabilizim-Asociim (MSA) me BE-në, si alternativë për të dalë nga izolimi disa vjeçar.

 

Javën e kaluar Kosova ka përmbyllur negociatat për MSA, ndërsa në pjesën e dytë të këtij viti, pritet të hyj në fuqi marrëveshja. Dhe pas kësaj, prodhuesit kosovarë produktet e tyre mund t’i plasojnë edhe në tregun e Bashkimit Evropian.

 

Ministri i Tregtisë dhe Industrisë, Bernard Nikaj tha se MSA-ja është një hap i madh kualitativ në drejtim të integrimit të përgjithshëm të Kosovës drejt BE-së, por në veçanti drejt integrimit ekonomik.

 

“Ne kemi negociuar një marrëveshje që është shumë e beneficueshme për bizneset dhe ekonominë vendore, duke siguruar treg të qëndrueshëm në vendet e BE-së, si dhe kushte mjaft të volitshme për prodhuesit vendorë ndaj tregjeve evropiane. Në të njëjtën kohë, duke siguruar edhe mbrojtje të mjaftueshme për prodhuesit vendorë nga fluksi i prodhimeve nga vendet e BE-së”, thotë Nikaj për REL.

 

Problemet e integrimit të ekonomisë së Kosovës në ekonominë globale, thekson Nikaj, fillimisht kanë pasur të bëjnë me lirinë e lëvizjes nga Kosova drejt vendeve tjera.

 

Profesori i ekonomisë, Naim Gashi, thotë se nënshkrimi i Marrëveshjes së Stabilizim-Asociimit, i cili do të ndihmonte integrimin e ekonomisë së Kosovës në atë globale, po vonohet nga ana e Komisionit Evropian,  për arsye se jo gjithmonë Kosova i plotëson të gjitha kriteret.

 

“Në rastin e Kosovës, kemi shumë paqartësi brenda Komisionit Evropian dhe ato paqartësi politike për shkak të mosnjohjes së Kosovës nga 5 vende anëtare të BE-së, po reflektojnë negativisht në avancimin e procesit të mekanizmit të Stabilizim – Asociimit, por edhe në anëtarësimin e Kosovës në iniciativa ekonomike rajonale dhe evropiane”, vlerëson Gashi.

 

Sidoqoftë, hyrja në fuqi e kësaj marrëveshje, përveç tjerash, sipas Gashit, ekonomikisht promovon interesat dhe përfitimet e ndërmarrësisë së Kosovës.

 

“Stabilizim-Asociimi sjell përftime financiare për Kosovën, sa më tepër që Kosova të ofrohet në rrugën drejt Bashkimit Evropian, aq më të mëdha janë fondet investuese nga ana e BE-së, pasi që politika e BE-së është që vendet nëpërmes procesit të Stabilizimit-Asociimit të përafrohen me nivelin, qoftë zhvillimor, qoftë politik, qoftë shoqëror me vendet e BE-së. Vetëm atëherë kur ne të bëhemi të përafërt me BE-në, vetëm atëherë do të bëhemi pjesë e Bashkimit Evropian”, konsideron Gashi.

---