Murati kërkon ndihmën e Austrisë për mësimin plotësues

Mësimi plotësues i gjuhës shqipe në diasporë dhe tërheqja e investimeve nga jashtë, janë dy projektet prioritare të MeD-it për këtë vit, tha ministri Murati

Ministri kosovar i Diasporës, Valon Murati kërkoi nga diplomatët austriak, bashkëpunim më të madh për zhvillimin e mësimit plotësues të gjuhës shqipe për nxënësit shqiptarë në Austri. Këtë deklaratë Murati i bërë gjatë një takimi që zhvilloi me ambasadorin e Republikës së Austrisë në Prishtinë, Gernod Pfandler.

Në takim, përveç njohjes me punën e deritashme të Ministrisë së Diasporës dhe sfidat e saj të mëtejshme, u diskutua edhe për thellimin e bashkëpunimit ndërinstitucional në fusha të ndryshme, duke pasur parasysh faktin se diaspora shqiptare ka koncentrim të madh në vendet gjermanofolëse, duke përfshirë edhe Austrinë.

Ministri Murati, në takim me z. Pfandler, i dha theks të veçantë mësimit plotësues të gjuhës shqipe në diasporë dhe tërheqjes së investimeve nga diaspora, dy projekte me prioritet në objektivat e Ministrisë për këtë vit, të cilat kërkojnë bashkëpunim më të thellë institucional.

“Rrjetet e bizneseve në Austri, të cilat janë iniciuar nga Ministria e Diasporës, janë jashtëzakonisht aktive në punën e tyre. Tashmë, ato janë duke shërbyer edhe si urë lidhëse jo vetëm mes tyre, por edhe mes bizneseve austriake dhe Kosovës me ide për projekte investive në të ardhmen e afërt”, tha ministri Murati.

Po ashtu, Murati e njoftoi ambasadorin austriak për projektet që Ministria e Diasporës planifikon t’i fillojë me implementim në kthimin e remitancave nga diaspora në projekte investive, në veçanti në fushën e agrikulturës dhe të teknologjisë informative.

Nga ana tjetër, ambasadori Pfandler e rikonfirmoi përkrahjen e Austrisë për Kosovën, ndërsa e lavdëroi komunitetin shqiptar në Austri si komunitet të integruar mirë.