Murati bashkatdhetarëve: raportoni kompanitë mashtruese

Nëpërmjet një mesazhi në facebook, ministri Murati i ka ftuar bashkatdhetarët që të bëjnë ankesa dhe të identifikojnë agjencitë turistike të cilat i kanë mashtruar me bileta

albinfo.ch

Shqetësimit të bashkatdhetarëve kosovarë për vonesa gjatë ardhjes dhe kthimit në vendet e punës i është bashkuar edhe ministri i Diasporës Valon Murati. Nëpërmjet një mesazhi në facebook, ai ka ftuar bashkatdhetarët që të bëjnë ankesa dhe të identifikojnë agjencitë turistike të cilat i kanë mashtruar me bileta.

“Të nderuar bashkatdhetarë, të gjithë ju që këto ditë keni rënë pre e mashtruesve të agjencive turistike gjatë kthimit nga Kosova në vendet ku punoni, në mënyrë që t’ia lehtësoni edhe Ministrisë së Infrastrukturës në trajtimin e kësaj problematike, klikoni në http://www.mi-ks.net/sq/aviacioni-civil për të bërë ankesë zyrtare”, thotë Murati.

Ministri kosovar po ashtu jep edhe detaje shtesë se ku mund të ankohen bashkatdhetarët.

“Në këtë link hapeni “Formularin e BE-së për ankesat e udhëtarëve nëpërmjet ajrit” si dhe më poshtë hapeni linkun i cili shpjegon procedurat e ankesës. Duke u ankuar e ndihmoni procesin e identifikimit të keqbërësve”, thuhet në reagimin e ministrit Murati në rrjetin e tij social.

Ndryshe, gjithmonë gjatë ardhjes, por edhe kthimit të bashkatdhetarëve në vendet e tyre të punës, shfaqen mashtrimi në dhënien e biletave. Albinfo.Ch disa herë ka raportuar se si janë stërshitur biletat, ndërsa pasagjerët kanë mbetur me orë të tëra, por edhe me ditë në aeroport.