Murati uron diasporën për Vitin e Ri

Ministri i Diasporës, Valon Murati, thotë se edhe një vit i ri do të fillojë së bashku me shpresat dhe aspiratat – dëshirën e çdo njeriu për lumturi, suksese dhe mirësi

“Në vitin që vjen, shpresojmë edhe për një të ardhme më të mirë, për të gjithë ne, në Kosovë dhe diasporë, një të ardhme të ndritur për kombin tonë. Para së gjithash, dua t’ju uroj shëndet juve dhe familjeve tuaja”, ka thënë Murati në urimin adresuar mërgimtarëve..

Ministri ka shprehur përkushtimin e tij dhe të Ministrisë së Diasporës, se në vitin që po hyjmë do të punojë për realizimin e objektivave strategjike të ministrisë, që lidhen drejtpërdrejt me konsolidimin e lidhjeve të vendit me diasporën dhe fuqizimin e këtyre lidhjeve, ruajtjen e identitetit kombëtar, integrimin e tyre në shtetet ku jetojnë, si dhe hapjen e rrugës për diasporën që të jetë pjesë e rëndësishme e zhvillimit socio-ekonomik, arsimor e kulturor të vendit dhe kombit.

“Do të punojmë që atdheun ta keni më afër, që ai t’u gjendet më pranë kur të keni nevojë për të, që të jetë më i dashur kurdo që vini, por edhe do të angazhohemi që t’i krijojmë mundësitë të jemi një urë lidhëse mes jush dhe atdheut”, ka thënë Murati.