Naftëtarët me protesta kërkojnë pagat e tyre

Protestuesit kanë kërkuar ndërhyrjen e qeverisë të zbatojë ligjin dhe tu japë zgjidhje punëtorëve që erdhën në këmbë nga Fieri deri këtu

Me protesta para Ministrisë së Energjisë, naftëtarët e Fierit dhe Ballshit kanë kërkuar dy pagat e tyre të pa mara dhe sigurimet shëndetësore.

Përfaqësuesit e sindikatave të naftëtarëve dhe një përfaqësues nga punëtorët kanë pasur takim me Ministrin Gjiknuri. Ata kanë kërcënuar edhe me grevë urie nëse problemi i tyre nuk gjen zgjidhje. Protestuesit kanë kërkuar ndërhyrjen e qeverisë të zbatojë ligjin dhe tu japë zgjidhje punëtorëve që erdhën në këmbë nga Fieri deri këtu.

“Nuk kemi çfarë humbasim, do të ikim vetëm kur të marrim lekët. Kemi pa marrë dy paga të këtij viti, nëntori dhe dhjetori dhe kemi 13 paga të vitit 2015-2016”, ka thënë njëri nga protestuesit.

Ndryshe këta protestues kanë mbërritur mbrëmë në Tiranë ku edhe kanë kaluar natën në makinat personale të disa aktivistëve të Organizatës Politike që mbështet këtë protestë.