Nazane Breca, emërohet ambasadore e re në Zvicër

Presidentja në ikje, Atifete Jahjaga dekretoi ambasadorët e rinj: Skender Durmishi në Malin e Zi, Lulzim Iseni në Kanada, Nazane Breca në Zvicër etj

Një ditë para se ta përfundoj zyrtarisht mandatin 5-vjeçar si presidente e Kosovës, Atifete Jahjaga ka dekretuar nëntë ambasadorë të rinj dhe një konsulle të përgjithshme. Këtë proces, presidentja e zhbllokoi pas një vjet ndalje, duke dekretuar edhe ambasadoren e re në Zvicër.

Jahjaga i kishte bllokuar këta emra për shkak se konsideronte se të propozuarit ishin politikë, që binte ndesh me ligjin. Sipas ligjit, Ligji për shërbimin diplomatik parasheh respektimin e kuotës 50 me 50; që i bie 50 për qind të jenë diplomatë karriere e 50 për qind emra politikë.

Ambasadorët e dekretuar janë këta: Skënder Durmishi, ambasador në Malin e Zi; Lulzim Iseni, ambasador në Kanada; Albert Prenkaj, ambasador në Panama; Nazane Breca, ambasadore në Zvicër; Qendrim Gashi, ambasador në Francë; Ramiz Lladrovci, ambasador në Shqipëri; Leon Malazogu, ambasador në Japoni; Bernard Nikaj, ambasador në Belgjikë; Luljeta Vuniqi, ambasadore në Hungari dhe Teuta Sahatqija, konsulle e përgjithshme në Nju Jork.

Ndryshe, Nazane Breca është e lindur më 28.03.1958 në Prishtinë dhe ka qenë deputete e Kuvendit të Kosovës nga radhët e LDK-së gjatë viteve 2011-2014. Ajo është specialiste e mjekësisë familjare. Në këtë post e zëvendëson ish-ambasadorin Naim Malaj, i cili vitin e kaluar dha dorëheqje nga ky post.