Ndal veturën me ble pemë, ia vjedhin 35 mijë franga

Një familje nga Kosova ishte ndalur në Milot të Shqipërisë për të blerë pemë, ndërsa shitësja dyshohet se ia ka vjedhur 35 mijë franga dhe një telefon "Iphone 5"

Një bashkëkombës kosovarë që udhëtonte nëpër Shqipëri në drejtim të Kosovës, ka rënë pre e hajnave në rrugën Fushë Krujë-Lezhë. Çifti kosovar me vendbanim në Randobravë të Prizrenit, ishte ndalur në skaj rrugës për të blerë fruta, ndërsa pas pak kishte vërejtur vjedhjen e kuletës me 35 mijë franga zvicerane.

Sipas medieve shqiptare, kosovari që udhëtonte në Rrugën e Kombit ka ndaluar makinën në vendin e quajtur Fushë-Milot të rrethit të Kurbinit, në një zonë ku shiten pemë dhe perime në kioskat në anë të rrugës.

Pasi ka kryer blerjet, burri ka hipur në makinë dhe gjatë rrugës ka vërejtur se nuk e ka portofolin e gruas dhe një celular Iphone-5.

Pas debatit me shitësen, e dyshuar prej kosovarit për vjedhjen, ai ka njoftuar policinë, e cila, pasi ka mbërritur në vendin e ngjarjes, ka arrestuar 49-vjeçaren Bukurije Zeneli, me banim në fshatin Shullaz, raportojnë mediat në Tiranë.

49-vjeçarja Zeneli nuk e ka pranuar vjedhjen, ndërkohë që policia vijon hetimet.