Ndërkombëtarët, të shqetësuar me krizën politike në Kosovë

Shtetet e QUINT-it nëpërmjet një komunikate kanë thënë se Kosova ka shumë sfida dhe qytetarët e saj meritojnë një Kuvend dhe Qeveri për t’u ballafaquar me këto sfida

Pesë shtetet më të fuqishme politike që janë të akredituara në Kosovë të njohura si QUINT (Shtetet e Bashkuara të Amerikës, Britania e Madhe, Gjermania, Franca dhe Italia) shprehen të shqetësuara me ngërçin politik në Kosovë, që u shkaktua pas zgjedhjeve parlamentare të 11 qershorit. Ambasadorët e QUINT-it u bëjnë thirrje deputetëve kosovarë që të shkojnë në seancën e të hënës, dhe të procedojnë me zgjedhjen e organeve të reja të Kuvendit dhe Qeverisë.

Shtetet e QUINT-it thonë se është përgjegjësi e liderëve Kosovarë t’i krijojnë institucionet por edhe të ndërmarrin reformat e nevojshme që të parandalojnë bllokada të tilla në të ardhmen.

“Jemi të brengosur me situatën politike në Kosovë. Kosova është duke u ballafaquar me shumë sfida, ato të tanishme dhe ato afatgjata duke përfshirë këtu programin e Fondit Monetarë Ndërkombëtarë, situatën energjetike por edhe nevojën për zhvillim ekonomik, fuqizimin e sundimit të ligjit, perspektivën evropiane të Kosovës dhe marrëdhëniet e Kosovës me Serbinë. Qytetarët e Kosovës meritojnë një Kuvend dhe Qeveri për t’u ballafaquar me këto sfida”, shkruajnë diplomatët e QUINT-it.

Sipas tyre, Është përgjegjësi e liderëve kosovarë t’i krijojnë këto institucione, por edhe të ndërmarrin reformat e nevojshme që të parandalojnë bllokada të tilla në të ardhmen.

“Shpresojmë që liderët kosovarë, si në politikë ashtu edhe në shoqërinë civile, do të prijnë në zgjedhjen e kësaj çështjeje duke ofruar propozime konkrete. Një parim primarë dhe i rëndësishëm është se deputetët e zgjedhur në Kuvendin e Kosovës duhet të marrin pjesë në seancat e Kuvendit dhe të lejojnë fillimin e punës së saj”, thuhet në deklaratën e përbashkët të shteteve të QUINT-it.

Ndryshe, kanë klauar më shumë se dy muaj nga zgjedhjet e parakohshme parlamentare dhe partitë politike nuk po arrin t’i zgjedhin organet drejtuese të Kuvendit, kryetarin dhe nënkryetarët, si dhe qeverinë e re.  Koalicioni fitues PAN nuk i ka votat e mjaftueshme për votimin e kryeparlamentarit dhe kryeministrit, ndërsa tri partitë tjera po e bllokojnë atë.