Në 100 vjetorin e lindjes, dekorohet akademik Ajeti

Presidenti i Kosovës, Hashim Thaçi e dekoroi akademik Idriz Ajetin në 100 vjetorin e lindjes. Thaçi Ajetin e quajti “Çabej i Kosovës"

Në 100 vjetorin e lindjes, presidenti i Republikës së Kosovës, Hashim Thaçi, e ka dekoruar akademik Idriz Ajetin me Medaljen Presidenciale të Meritave. Këtë medalje, presidenti Thaçi ia ka ndarë akademik Idriz Ajetit për kontributin e jashtëzakonshëm në fushën e arsimit, shkencës dhe kulturës.

“Ju që këtë vit po mbushni një shekull, për mua jeni Çabej i Kosovës në fushën e studimeve albanologjike”, ka thënë presidenti Thaçi.

Ndërsa akademiku i parë i Kosovës dhe ish rektori i Universitetit të Prishtinës, akademik Ajeti e falënderoi presidentin për këtë çmim. “Ju falënderoj për këtë nderim që po ma bëni”, u shpreh akademik Idriz Ajeti.

Me veprimtarinë e tij, akademik Idriz Ajeti ka kontribuar shumë edhe në forcimin e identitetit tonë kulturor.

Idriz Ajteti ka lindur në Tupallë të Medvegjës në qershor të vitit 1917. Ai ka qenë  pjesëmarrës në Kongresin e Drejtshkrimit në Tiranë në vitin 1972, ndërsa për disa vite me radhë ka qenë Rektor i Universitetit të Prishtinës dhe drejtor i Institutit Albanologjik të Kosovës. Po ashtu akademik Ajteti ka qenë profesor dhe dekan në Fakultetin e Filozofisë në Prishtinë dhe kryetar i Akademisë së Shkencave dhe Arteve.

Ish-presidenti Ibrahim Rugova e dekoroi akademik Ajetin me Medaljen e Artë të Lidhjes së Prizrenit, ndërsa me rastin e 90-vjetorit të lindjes, pesidenti Fatmir Sejdiu e dekoroi me Çmimin Presidencial për Studiues.