Në Parlamentin e Serbisë, pozitë e opozitë akuzojnë njëra-tjetrën për bashkëpunim me Kurtin

Sot, deputeti shqiptar i Parlamentit të Serbisë, Shaip Kamberi, ka thënë se tollovia në seancën e konstituimit të Kuvendit të Serbisë u karakterizua me akuzat e ndërsjella mes pushtetit dhe opozitës se kush është “bashkëpunëtor i Kurtit”, përcjell albinfo.ch.

Ai përmes një postimi në Facebook, ka shkruar se nën fishkëllimat e opozitës ka dështuar përfundimi i seancës konstituive në Serbi.

“Përveç verifikimit të mandateve, nuk është arritur të zgjedhet kreu i Parlamentit, sepse opozita me protestat përmes fishkëllimave nuk ka lejuar vazhdimin e seancës. Nuk dihet kur do të jetë vazhdimi. Gjithë kjo tollovi u karakterizua me akuzat e ndërsjella pozitë-opozitë se kush është ‘bashkëpunëtorë i Kurtit’. Sidoqoftë, bashkë me Ahmedinin dhe Selmën nga SDA do të vazhdojmë angazhimin tonë në një mjedis politik parlamentarë të kontaminuar”, ka shkruar ai.

Seanca konstituive e Kuvendit të Serbisë, ku u konfirmuan mandatet e deputetëve të përbërjes së re, kaloi me fishkëllima nga opozita.

Deputetët e opozitës ishin para foltores me pankarta ku shkruhej “I keni vjedhur zgjedhjet” dhe “Hajdutë, kthejini mandatet”.

Lista e opozitës ‘Serbia kundër dhunës’ pretendon se zgjedhjet e dhjetorit ishin të parregullta, gjë që pushteti e refuzon.

Për shkak të akuzave për vjedhje zgjedhore, deputetët e koalicionit ‘Serbia kundër dhunës’ e kanë bërë betimin në korridorin e Kuvendit dhe jo në sallë.