Në Prishtinë inaugurohet Eko-Parku i parë

Ky Eko-Park është tërësisht unik në vend. Pas ceremonisë së kurorëzimit, të sapo-martuarit në Komunën e Prishtinës do të inkurajohen të mbjellin një pemë në këtë zonë

Ky park u inaugurua sot në hyrjen kryesore të kryeqytetit të Kosovës, me qëllim për uljen e ndotësve të ajrit dhe për të përmirësuar cilësinë e jetës së qytetarëve.

Ky Eko-Park është tërësisht unik në vend. Pas ceremonisë së kurorëzimit, të sapo-martuarit në Komunën e Prishtinës do të inkurajohen të mbjellin një pemë në këtë zonë. Parku ka kapacitet për mbjelljen e 120 drunjve, i cili krijon një oazë të vogël në një nga kryqëzimet më të ngarkuara të qytetit me kapacitet për të absorbuar rreth 200,000 kg CO2 për 10 vitet e ardhshme.

Kryetari i komunës, Shpend Ahmeti, që inauguroi Eko-Parkun në bashkëpunim me Coca-Cola HBC, ka përgëzuar realizimin e tij dhe ka thënë se ka rëndësi të lartë për komunitetin.

“Është një akt i veçantë dhe i paharrueshëm që sot po mbjellim një fidan për të simbolizuar bashkimin e jetës sonë dhe për të siguruar oksigjen të mjaftueshëm për dy njerëz”, thanë për fund çifti i sapo kurorëzuar teksa mbillnin fidanin e tyre.