Nënshkruhet marrëveshje për demarkacion

Republika e Kosovës ka përmbyllur sot procesin e demarkacionit edhe me Malin e Zi, pasi që nënshkroi në Vjenë Marrëveshjen për Kufirin Shtetëror

Përkundër protestave të banorëve të Rugovës dhe kundërshtimit të opozitës, zëvendëskryeministri dhe ministri i Jashtëm i Kosovës, Hashim Thaçi, dhe ministri i Brendshëm, Skender Hyseni, e kanë nënshkruar në Vjenë, demarkacionin me Malin e zi, bazuar në vijat administrative të vitit 1974.

Marrëveshjen e kanë nënshkruar, për palën kosovare, zëvendëskryeministri Thaçi dhe ministri Hyseni, ndërsa për palën malazeze, zëvendëskryeministri dhe ministri i Jashtëm, Igor Llukshiq dhe ministri i Brendshëm, Rashko Konjeviq. Dëshmitarë të nënshkrimit ishin kryeministri i Kosovës, Isa Mustafa, kryetari i Malit të Zi, FillipVujanoviq si dhe ministri i Jashtëm i Austrisë, Sebastian Kurz.

Thaçi pas nënshkrimit të marrëveshjes përsëriti se marrëveshja është në “përputhje të plotë me Kushtetutën e vitit 1974, Dokumentin e Presidentit Ahtisaari dhe Kushtetutën e Republikës së Kosovës”.

“Kjo është një ditë e rëndësishme për Kosovën, për Malin e Zi por edhe për tërë rajonin, që dëshmon se rajoni ka hyrë në një periudhë të bashkëpunimit dhe po ecën sigurt në rrugën e integrimeve euro-atlantike”, tha ai.

Ndërsa sëvendëskryeministri dhe ministri i Jashtëm i Malit të Zi, Igor Llukshiq, u shpreh se marrëveshja është shembull për rajonin dhe vlerësoi se është bërë në prag të Samitit të Vjenës, si konfirmim se rajoni është i përkushtuar në procesin e integrimit në BE dhe NATO.

Zëvendëskryeministri dhe ministri i Jashtëm Thaçi nënvizoi se Kosova tanimë ka përmbyllur procesin e demarkacionit të kufirit me Shqipërinë, Maqedoninë dhe tani edhe me Malin e Zi dhe shprehu shpresën se së shpejti do të përmbyllet edhe me Serbinë.

Në anën tjetër, qindra qytetarë kanë protestuar sot në Pejë, kundër demarkacionit me Malin e Zi. Ata kanë mbajtur të bllokuar rrugën në drejtim të Kullës, duke kërkuar nga Qeveria që mos ta marrë për bazë  kushtetutën e vitit 1974, e cila ia falë malit të zi rreth 12 mijë hektarë tokë të Kosovës.

Edhe kryetari i AAK-së, Ramush Haradinaj është deklaruar kundër marrëveshjes për demarkacion, madje ka deklaruar se marrëveshje do të ketë pasoja edhe personale, për ata që e shkruajnë por edhe politike.