Nëse ndahet veriu i Kosovës, ndodhë bashkimi kombëtar

“Bashkimi i Kosovës me Shqipërinë nuk do të ishte një Shqipëri e madhe, por Shqipëri e re, jo e kërkuar nga shqiptarët por e provokuar nga të tjerët”, ka deklaruar Ben Blushi

Publicisti dhe deputeti i Kuvendit të Shqipërisë, Ben Blushi thotë se “nëse ndahet veriu i Kosovës, pasojë do ishte bashkimi i Kosovës me Shqipërinë”. Lideri i Lëvizjes LIBRA, Blushi ka kritikuar diplomacinë shqiptare në lidhje me situatën në Kosovë, duke kërkuar që shteti shqiptar të merret seriozisht me këtë çështje.

“Politikës sonë të jashtme i mungon parashikimi, nuk ka sens. Është si të thuash të luash basketboll pa dorë. Duke qenë e dobët Shqipëria sot nuk ka se si ta ndihmojë Kosovën. Investimi personal i kryeministri në Beograd sot nuk vlen asnjë gjë. Serbët nuk ia vlejnë miqësinë e çmuar që ofroi pa kushte. Ata mendojnë se e kanë këputur Shqipërinë që sot nuk mund të jetë një faktor në problemin e Kosovës. Shqipëria është aktori më i dobët sot në Kosovë”, konsideron Blushi.

Parlamenti i Shqipërisë, sipas tij, duhet të merret seriozisht me çështjen e Kosovës.

“Unë kam propozuar një rezolutë në komision të jashtëm dhe do ishte mirë që të merrej me të…Nëse Kosova ndahet në veri, atëherë pasoja do ishte bashkim i Shqipërisë me Kosovën, pasoja e arsyeshme dhe e vetme nëse kjo ndodh. Bashkimi i Kosovës me Shqipërinë është i vetmi i arsyeshëm”, konsideron Blushi.

Nuk do të ishte një Shqipëri e madhe, sipas tij, por Shqipëri e re, “jo e kërkuar nga shqiptarët por e provokuar nga të tjerët”.

Blushi tha se me provokimet e tyre serbët duan të provokojnë se projekti i një Kosove të pavarur ka dështuar.

Sipas liderit të LIBRA-s, tashmë është e qartë se serbët duan ta ndajnë Kosovën. “Nuk besoj dhe nuk kam arsye ta besoj se ky është projekt ndërkombëtar, por jam i sigurt se në të ardhmen mund të kthehet në një projekt ndërkombëtar. Përveç Kosovës edhe Shqipëria e ka humbur peshën në rajon e më gjerë”, tha Blushi.

Ndryshe, kohën e fundit provokimet e serbëve në Beograd, tregojnë se Serbia ka qëllime të hapura për aneksimin e tri komunave veriore. Madje edhe presidenti Hashim Thaçi tha hapur se Serbia po i armatosë serbët e veriut, për t’iu kundërvënë autoriteteve të Prishtinës.