Nga sot, Kosovë – Maqedoni vetëm me letërnjoftime

Nga mesnata ka hyrë në fuqi marrëveshja ndërshtetërore Kosovë – Maqedoni, që kufiri të kalohet vetëm me letërnjoftime biometrike

Që nga dita e sotme (17 prill), ka hyrë në fuqi vendimi i dy qeverive, Kosovës dhe Maqedonisë, që qarkullimi në dy anët e kufirit të bëhet vetëm me letërnjoftime biometrike. Ndërsa në ora 15 në vendkalimin Han i Elezit-Bllacë, do të mbahet ceremonia solemne e hyrjes në fuqi të marrëveshjes bilaterale.

Mediet në Kosovë thonë se nga mesnata në dy pikëkalimet zyrtare, Bllacë dhe Jazhincë marrëveshja po zbatohet pa asnjë problem. Kjo marrëveshje vlen vetëm për shtetasit që kanë letërnjoftime biometrike. Për ata që kanë letërnjoftime të vjetra është e domosdoshme pasaporta.

Marrëveshja për kushtet e udhëtimit me letërnjoftime është nënshkruar nga ministritë e jashtme të Maqedonisë dhe Kosovës dhe më pas është ratifikuar nga parlamentet e të dyja vendeve. Përveç hyrjes me letërnjoftim, marrëveshje ndërshtetërore parashikon edhe ndërtimin e pikëkalimit të ri Stançiq-Bellanoc nëpër malësinë e Karadakut. Ky pikëkalim pritet të hapet sivjet.