Nga tani, edhe targa me ngjyrë të kuqe në Zvicër

Zvicra ka filluar përdorimin e targave të kuqe e të dedikuara për të gjitha ata që bartin në pjesën e pasme të veturës, “varësen” për biçikleta e cila do të lehtësojë vozitjen.

Bëhet e ditur se shteti i Zvicrës ka filluar të aplikojë përdorimin e targave të reja për vetura, që zor se nuk bien në sy. Përdorimi i tyre nuk do të jetë i obligueshëm, por shumëkujt do t’ia lehtësojë vozitjen, përcjell albinfo.ch.

Thuhet se këto targa janë të dedikuara për të gjitha ata që bartin në pjesën e pasme të veturës “varësen” për biçikleta.

E duke marrë parasysh se vendosja e biçikletave në pjesën e pasme pamundëson ekspozimin e targave, pronarët duhet t’i vendosin ato në “varëse”.

E në të ardhmen këtë nuk kanë nevojë ta bëjnë, pasi që do të mund të sigurojnë targën shtesë me ngjyrë të kuqe që do të përdoret ekskluzivisht në “varësen” e biçikletës.

Zvicra tashmë ka informuar disa vende evropiane për këtë ndryshim, e aktualisht në listën e shteteve që kanë vendosur të pranojnë këtë vendim të autoriteteve zvicerane janë Gjermania, Franca, Italia, Austria, Estonia, Holanda, Norvegjia, Polonia, Spanja e Britania e Madhe.

Zviceranët targat e reja mund t’i porositin nga 1 marsi, e të parat pritet të jenë të qasshme në fund të muajit të ardhshëm.

 

---